Speech #2

 

The following speech was composed by Serena Demientieff and was then translated into Yup'ik. The topic is Child Abuse. She is currently a Junior in Akula Elitnaurvik.

 

MIKELNGUQ NANGTAARUMALRIA

Mikelngurmek-qaa tangerqallruuten nangtaarumaangalngurmek? Kegginaa qiunelirluni, iingan-llu avatek cali qiumalutek wall'u puverpaglutek. Takuani-llu mikelnguum nangtaarumalriim yagtellriani uluryataararaqluni. Angniitnaqluni tangellra mikelnguum. Kenkumanricukluni-wa angayuqaaminun umyuarteq'lallilria, wallu kitumun assikenricukluni. Aliingurluteng-llu utertellerkameggnek pilartut natmun ayaggaarluteng. Maa-i-kiq qaillun amllertalartat mikelnguut waten nangtaarumalriit. Qaillun-llu ikayuryugngaciqseta mikelnguq angayuqaamikun nangtaarumalria.

Maa-i, mat'um nalliini mikelngurtangqelartuq nangtaarumalrianek angayuqamegteggun. Angayuqaita cakevkenaki irniateng tenglugaqluki, qacartaaraqluki-llu unatmegteggun. Ilaita-llu irniateng qacartenritaqamegteki igcetaqluki tuss'aranun. Mikelnguq casciigataqluni nangcesciuraqami angayuqaagmikun. Qiunri-wa cali kegginaan avatiini wall'u qaingani piciatun. Qenqertaqameng-llu angayuqait irniateng taqsuqararutaqameggteki nangtelarait.

Mikelnguq nangtaarumalria kenkumanricukluni umyuarteqenglartuq, tua-i-wa aknirniurturaalaami nangcimarraarluni angayuqaamikun. Yugnikekngangqerrsaaqelallilria-wa tayima taugaam aipaqesciigataqluki aliingaqami angayuqaagminek. Ataam utreskuni angayuqaagni qenqernayuklukek nanglluku-llu.

Kenkumanricukluni mikelnguq piaqami kiimellirrngatellriatun pilartuq. Qiaguralallilriit-llu tayima qavaqernatkameggnun. Aknirniurluni qanerturluni-llu umyuamikun angayuqagminun kenkumanritniluni yugnikekngaminun-llu assiilkeniluni. aliayugluni-llu kiimetauralallilria qavarvimini. Cali-llu aliingurluni uitauralallilriit angayuqateng itqernayukluki qavarvimeggnun. Natmun ayaggaarluteng utertaqameng alingluteng utertelartut, iteryuumiitelallilria-llu-wa eneminun angayuqaagni piteklukek . Cali-llu allat yuut nakukaqatni ellminek anagacesciganani, taugaam akngirtellerkani alikluku qimagaaqluni. Kiituan nakukengiinaraat tauna. Ayagayuumiitaqluni-llu natmun, elitnaurviungraan wall'u enekengermiu, tua-i-wa alingluni akngertellerkaminek piluni.

Maani America-mi amllertut nangtaarumalriit mikelnguut. Ilait yungcarvigmun piaqluteng navgillruaqameng enmeggnek tememeggni wall'u cakneq nangcimallruaqameng. Miilicaaq ciparrluku mikelnguut nangtaarumalartut allrakum ataucim iluani. Amllerikanilartut ataucim allrakum iquani. Avgit mikelnguut nangtaarumalriit amllenrit allrakungqelartut arvinlegnek. Taugaam cali qaillun angtangermi mikelnguq nangtaarumalartuq. Taqnerurniararli wall'u elitnauqerraarli. Ilait cakneq nangtaarumalriit yuunrilartut, tua-i-wa cakneq akngirtellruameng cali-llu angayuqaita kenkevkenaki irniateng piamegteki.

Ikayuryugngaaput mikelnguut nangtaarumalriit. Cali amllertut ikayurviit. Qayagauryugngaaput-llu ikayurviit nallunrilkengangqerqumta mikelngurmek nangtaarumalriamek, cali igaryugngaluki ikayurviit nallunrilkengangqerniluten mikelngurmek,cali-llu internet-akun ikayurvignek pitangqertuq. Angayuqaita unicaaqeciiqait taugaam akngirngairulluteng mikelnguut piciiqut cali-llu angninruluteng alingyuirulluteng-llu angayuqameggnek wallu kitumun nangnayukluteng.

Atauciq mikelnguq nangtaarumanrituq. Nallunguarluku wall'u pinrilnguarluku mikelnguq nangtaarumalria pinrillaut. Nallunrirtuci qaillun ikayurkavcenek nallunrilkengangqerkuvci. Angniitnarquq tangellra mikelnguum nangtaarumaluni wall'u yuunrirluni angayuqaita nangtaallruaqameggteki. 


Back to Speech Contest Page

To send questions or comments, please contact Akula Elitnaurvik